الصداقة كنز لا يفنى

[ندعوك للتسجيل في المنتدى أو التعريف بنفسك لمعاينة هذه الصورة] الصداقه كنز لا يفنى

مقوله تعلمناها ونحنا صغار بس يا ترى بعدها بتمشي بهالعصر؟ رح احكي بعض المواقف يالي بتصير وصارت ورح تصير ...
الموقف الاول
واحد عم يسوق سيارتو وواقف بالاشاره بيجي يوقف جنبو رفيقو ( زميلو بالشغل )بيزمرلو بيلتفت الاول فيشوفو بيسلم عليه بحركه من ايدو يقلو : اهلين حبيب قلبي كيفك ؟
التاني : منشكر الله مشتاقلك والله ( لسا ضاهرين تنيناتن من الشغل وكانو بنفس المكتب )
الاول : وانا اكتر حبيب قلبي
بتتحرك الاشاره والسيارات كل وحده بتمشي بطريق بيقلو التاني للاول : خلينا نشوفك اي حبيبي انت
الاول : اي ماشي انشاله حبيبي
بس يبتعدو عن بعض بيقول الاول بقلبو:تضرب ما اثقلك رجال من بين الرجال
التاني بيقول بقلبو كمان :العماء شو شايف حالو مفكر ما حدا غيرو ركب سياره (.....)

الموقف التاني
بنتين رفقات الاولى عم تفرجي التانيه شو اشترت مبارح تياب ....
الاولى : شوفي حبيبيتي شو جبت ( وتبلش تطلعلا التياب من الخزانه )
التانيه : وااااااااااااااااااااااااااااااااااااو شو هيدا؟ بيجننوووووو
الاولى : اي لسا ما شفتي شي شوفي هودي كمان
التانيه : انشالله تتهني فيهم وتدوبيهم بعرق العافيه , ذوقك بيجنن والتياب بيطيرو العقل بعدين القالب غالب حبيبتي
بتفل التانيه وهي عم تقول : تضرب شو ذوقها بشع الله بيعطي الحلق للي ما الو دينين, حتى لو كان جسمها حلو نص مصيبه ....
الاولى( وهي عم تطل عليها من البلكون لتودعها)بتقول: العماء بعيونها عيونها كانت رح تطلع عالتياب, اي تروح تشتري مين منعها ولو اشترت اصلا ما بيلبقلا شي ...
الموقف التالت
بين تنين شباب واحد بدو يتزوج وغرقان بالديون وجاي يستلف من رفيق عمرو مصاري ....
الاول : حبيبي والله مستحي منك بس مضطر ... بدي اطلب منك تدايني شي (.....ليره) وبرجعلك ياهن بس يجينا النقوط انشالله .
التاني : من وين والله يا شريك انت بتعرف الوضع ما عم لحق عمصاريف البيت والمعاش عم يطير اول بأول , لا تاخزني والله كان بودي ساعدك .
الاول : ما عليش ولا يهمك انت ما تواخزني زعجتك .
بيضهر الاول من عند التاني وهو عم يحكي حالو : كل هالمصاري والارزاق الي تركلو ياها بيو بعد ما مات وبيضل ما معو انشالله عطول بتضل ما معك وتفقر وتصير تشحد بالطرقات ....
التاني وهو عم يسب ويلعن ومش عاجبو : يلعن شكلك شو طماع مفكر انو بدي وزع ورثة ابويا على امثالك صدقه اي روح اشتغلك شغلة تانيه وسد ديونك والا على شو اصلا عم تتجوز؟

الموقف الرابع
صبيه عم تعرف رفيقتها عخطيبها الي مسافر برا ورح ياخدها معو ...
الاولى يقبرني شو بحبو ليكي صورتو شوفيها .
بتشوفها التانيه وبتقول : اي انشالله تتهنو يا رب وانتي بتستاهلي اكتر من هيك وهو اصلا الكسبان انو اختار وحده متلك حبيبتي
الاولى: تسلميلي يا رب حبيبتي عقبال عندك نفرح فيكي وتخطبي الي بيقدرك ويقدر جمالك .

التانيه وهي فاله من عند الاولى : الدنيا حظوظ والي ما الو حض لا يتعب ولا يشقى الله بيعطي الفول للي ما الو ضراس , شو كان صار لو انا الي خطبت ورح سافر بدالها؟
الاولى كمان عم تحكي حالها : العمى شو حسوده عيونها طلعو لبرا بس شافت الصوره بتكون عم تقول يا ريتو خطبني الي وعلى شو عجمالها الفتان متل السعدانه ما فيها شي بينحب ..

الموقف الخامس
تنين تلاميذ ناطرن نتيجة الامتحان وبتطلع النتيجه تنيناتهن ناجحين بس واحد ممتاز والتاني جيد الاول يقول للتاني : مبروك النجاح اخوي
التاني : وانت كمان مبروك النجاح والامتياز
الاول : والله فرحتي ناقصه انت كمان بتستاهل احسن من هيك
التاني: ولا يهمك انت والا انا نفس الشي حبيبي المهم نجحنا ...
التاني وهو راجع عبيتو: انا الي ساعدتو بكل الامتحانات بطلع جيد وهو بيطلع ممتاز شو هالظلم هيدا. اي الله لا يوفقو انشالله ولا يوفقهن.
الاول وهو عم يحكي حالو : كان عم يباركلي وع شوي رح يبكي ما عاجبو, اي انا من اولتي اشطر منو عشو زعلان هيدا الغبي ؟[ندعوك للتسجيل في المنتدى أو التعريف بنفسك لمعاينة هذه الصورة]

بعد في مواقف كتير ما بتنعد بس بكتفي بهالقد لانو بيضل الصداقه الها معنى كبير عندي وما بدي طلع كل الاصدقاء خونه تحيه من هون لكل اصدقائي الحقيقين وهن بعرفو حالهن ...... [ندعوك للتسجيل في المنتدى أو التعريف بنفسك لمعاينة هذه الصورة]

الصديق وقت الضيق
[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]

شكرا على الموضوع

ونتمنى منك المزيد

» من وحي الصداقة