حكاية شامية

موضوع: حكاية شامية الجمعة يوليو 31, 2009 12:18 am

حكاية شامية

كالعادة أم حمدي و أبوحمدي يسهران يطالعان مبحلقان إلى مايعرضه التلفزيون و يفصفصان البزر و الأولاد نيام نيام نعم نيام
و يبدأ الحوار السوفسطائي بين الحبيب و حبيبته

أم حمدي : أبو حمدي شو قصة التقرير يللي عم يحكوا عنو؟و مين هاد اللي اسمو أبو الدتالف الملوسي؟
أبو حمدي : أبو الدتالف الملوسي لك هاد اسم الدلع تبع ديتليف ميليس ياعمري
أم حمدي : ومين هاد ليـفة ملسـة مدري خشنة؟
أبو حمدي : لك شو ليفة و شو ملسة و شو خشنة؟ لك هاد محقق كبير و شهير
شو علاقة التحقيق بليف الألمونيوم ؟
أم حمدي : يعني فينا نقول تقريبا يا ابو حمدي انو هاد الملوسي متل بدري أبو كلبشــة؟
أبو حمدي : لاااااااااااا شو بدري أبو كلبشـة؟ هاد تقريبا على مستوى المفتش كادجيت أو كولومبو أو المحقق كونان الشهير يعني هيك شي تقريبا بس مو أبو كلبشة؟
أم حمدي : و شو بدو هاد كمان و تقرير شو يللي عم يحكوا عنو و يللي صرعونا فيه هالكم يوم؟
أبو حمدي : لك بعتوه مشان يحقق بقضية ما دخلنا فيها اساسا بس شو بدك تعملي ازا امريكا بدها تلاقي اي مصيبة و تلزقها فينا هيك يعني تبلي بس
بلوة و بدهن يرموها علينا و بكل وقاحة و ابو الدتالف ما صدق على الله فورا فات فوتو و هجم يا غافل الك الله و بلش يرمي مصايبه شرق و شرق
طبعا مافي غرب كلو شرق
طلبوا منه كيف ما كان يلزق التهمة بسوريا و عم يشتغل على هالشي و كل واحد منهن عم يشتغل على مصالحو
بس الله كبير يا ام حمدي ولا يهمك الله كبير اكبر منهن المهم شو كنتي بدك تسأليني انتي؟
أم حمدي : ولك أبو حمدي؟
أبو حمدي : خيــر يا هالطير؟ خير انشالله؟ شبك؟
أم حمدي : لا مافي شي بس كنت بدي اسألك عنجد حلوين عيون هيفاء وهبي؟
أبو حمدي : مين هيفاء وهبي؟ لك و شو جاب سيرتها هلق بالنص؟ شو جاب سيرة التحقيق لهيك سيرة؟ تانيا شو عرفني انا فيها؟
أم حمدي : مين هيفاء وهبي لك عليي أنا يا محتال
على مرتك؟شو هالطيلسة و ليش عم تغشم حالك لك نسيت لما قلت لي روحي عملينا تسئية بنص الليل على أساس إنك جوعان و صرفتني للمطبخ و لما كبست عليك فجأة لقيتك حاطط القناة يللي حضرتك كنت تقول عنها تبع الأغاني الهابطة؟ لك نسيت كيف كنت صافن صفنة بغل على كوم شعير لما كانت حبيبة القلب عم تغني و تترقوص و عيونك مفنجرة عشرة على عشرة بالشاشة؟
أبو حمدي : أنا يا مرة؟ أنا اتفرج على هيك شكيلات؟ أنا؟ لك خافي ربك انا وشي هالوش؟
أم حمدي : إيـه إنت لكن أنا؟ و بالعلامة كمان كنت ماسك الريموت كونترول و عامل كتم للصوت مشان ما اسمع بالمطبخ ايه طبعا لكن اكيد ما حضرتك شو بدك بصوت الست الخانوم ما بيهمك حنجرتها الذهبية بيهمك الجينز اللي لابستو و البلوزة الحفر و البريق على جفونها و المسكرة على رموشها و العدسات الفاسقة مدري اللاصقة على عيونها
لك مو انت كنت مبارح عم تحكي عالموبايل مع أبو سعيد؟
لك والله سمعتك ما كنت عم تقلو شفت حفلة هفوئة مبارحيات شو كانت لابسة؟ لك مو انت قلتلو لأبو سعيد عليها جوز عيون بيسقطوا خط ماجينو؟ مدري شوربة ماجي؟
أبو حمدي : لك هوي سألني قال شفت وحدة هيك اسمها قلتلو شو اسمها كان عم يحكي عن صحفية والله بس انتي ما بعرف منين سمعتي هفوئة هوه والله يمكن قال هفوئة عالصحفية وانا كررت الكلام وراه مع إني مابعرف هالاسم بحياتي و حياتك عالغالي يا عمري عندي جوز عيونك بالدنيا و مافيها شوبدي انا بهاللعي كلو؟
أم حمدي : لا والله ما بصدقك جوزي و بعرفك مو علي هالحركات هات احكي لشوف اعترف قول بسرعة يلا
أبو حمدي : لك شو بدي قول منين طلعتلي هالمصيبة ياربي لك صدقيني مابعرف عن مين عم تحكي لك شو الظاهر التحقيق لاحقنا كمان للبيت؟
أم حمدي : أنا رح ارفع تقرير على كل حال لأمي و هيي بتعرف شغلها معك و رح ضمنو شهادة اتصالاتك مع ابو سعيد كلو مسجل عندي و كيف اتفقتوا تحضروا حفلتها الخميس الجاي كمان اعترف و قول يلا
أبو حمدي : لك يخرب بيتك منين طلعتيلي بهالمصيبة لك رح قلك الصراحة فعلا بصراحة كان ابو الدتالف الملوسي من كم يوم عامل لقاء صحفي و كان في صحفيين وصحفيات عم يسألوه وحدة من هالصحفيات كانت عم تسأله سؤال و هوي كان مطرمخ و مدري شو صارلو بس عم يبحلق بالصحفية و لما نكشوه و نبهو انو يحط السماعات تبع الترجمة قال اووووو اسف عفوا بس من جمال صوت البنت الصحفية نسيت حط السماعات و حبيت اتأمل جمال صوتها الطبيعي الله وكيلك والله هيك قال يعني الرجال لاحسين عقلاته الظاهر بهالكم يوم اللي قضاهن بالروشة و الكسليك و باليخت و مدري بكم تخت فأنا والله كنت عمشبه على وجه البنت نفسها يللي كانت عم تسأله بالمؤتمر الصحفي فعلا كانت بتشبه المغنية يللي انتي عم تقولي عنها و تتهميني فيها اني عم بحلق فيها و هي كل القصة والله
والله على ما اقول شهيد
بس والله فعلا فيها شبه غريب من المطربجية تبعك
أم حمدي : أبو حمدي عنجد هيك؟ اكيد يعني؟ لك والله خوفتني فكرتها آخدة عقلاتك والله و بصراحة إن بعض الظن إثم لاتواخذني يا أبو حمدي سامحني ياعمري سامحني بس والله الحق مو علي بهاليومين عنجد من كتر ما عم اسمعك تحكي و تتابع الملوسي يمكن عقلي قلب على تحقيق وسين و جيم بدون ما حس و نسيت انو عمرك 66سنة و بعرف البير و غطاه
على كل حال يقصف عمر اللي ببالي
أبو حمدي : ايه ايه ايه والله يقصف عمره يقصف عمره بس شو قصدك بتعرفي البير و غطاه؟
أم حمدي : لا تاكل هم و لا شي بس قلت يعني اكيد خالص كازك فليش الشك؟
أبو حمدي : خالص كازي؟ لك فعلا فعلا يقصف عمره
[ندعوك للتسجيل في المنتدى أو التعريف بنفسك لمعاينة هذه الصورة]

lol!

موضوع: رد: حكاية شامية الجمعة يوليو 31, 2009 2:50 pm

حلوووووووووو هيفا غير شكل
واذا جابت ولاد ولابسين غطره وعكال
بيطلعو شغله كبيره

[ندعوك للتسجيل في المنتدى أو التعريف بنفسك لمعاينة هذه الصورة]

» الرحيل حكاية بلا صوت ؟
» للرحيل حكاية ....
» حكاية مغترب
» مغتربة شامية
» زلاغيط شامية